عمرك شفت واحد ماشي, ومرة واحدة كدة عمل أي رد فعل غريب !!, أو كان بيكلم نفسة
يا ترى ليه.. ده أكيد تعبان نفسياً, على فكره أنا أعتقد أن نسبة كبيره من المصريين بيعانو من أمراض نفسية, ليه لأ و كل حاجة حواليهم بتخنقهم
نرجع لصاحبنا المجنون...
هتلاقيه مثلاً عنده أولاد, والأولاد دول في مدرسة.. يعني فيه مصاريف مدرسيه
وغير كده بقى في لبس مدارس و كتب و كراريس و شنط و جزم و مواصلات و مصروف
ده غير مصاريف الدروس أو المجموعات
ده غير أكل و شرب و لبس
و غير أيجار البيت. والنور والكهرباء والزبالة
و ده طبعا بخلاف رمضان و العيدين وباقي المناسبات
طب علشان يقضى كل ده هيعمل إيه
طبعاً هتلاقيه بيشتغل بأيده و سنانه .. ليل نهار
طب لو موظف زي ده إتعرضت عليه رشوة كبيرة علشان يمَشي مصلحة معينة
يا ترى هيقدر يتمسك بالصح
و مين المسئول عن إنه يكون في موقف فوق أحتماله زي ده
واحد زي ده بقى بعد ما يخلص شغله ويروّح
و تكون مراته كمان بتشتغل وراجعة تعبانة
مبيبصوش في وش بعض أصلاً
و يمكن ينامو من غير عشاء علشان يوفروا تمن الأكل
طب إيه ممكن يخلي واحد زي ده يعمل تجديد لحياته
إيه اللي يخليه مقبل على الحياة !!
وإيه اللي مخليه أصلاً قادر يستحمل كل ده !!
وإيه اللي مخليه معذب نفسه و محملها فوق طاقتها
هو بيكون عنده أمل واحد في حياته
إنه يشوف أولاده أحسن ناس في الدنيا
و أنه يخليهم مش محتاجين حاجة (على قد ما يقدر) طب و هوّ
ليه لغى نفسه ؟؟
فين أحلامه الشخصية و طموحاته و مستقبله
مش معنى إنه كِبِر إنه ميحلمش
...
أنا شايف أن جزء كبير من أسباب الهوه السحيقة بيننا و بين دول العالم المتقدم
أن أحنا عندنا نسبة كبيرة أقصى أحلامها تتلخص في تأسيس الابناء فقط
بدون أي طموح شخصي
في رأيي : الحلم هو الدافع الأقوى والأبقى للحياة
